لائیاں ہِم تاں توڑ نبھیساں اہَدا ہا
پیار کوں ہر گز لیِک نا لیساں اہَدا ہا
توݨے لوک کریسن حیِلے
تیݙے ناں ہِن نین نشیلے
دید کنوں نا دید ہٹیساں اہَدا ہا
خوشخبری ہا ݙیندا مل تے
تیݙا ناں لکِھ چھوڑیم دل تے
ناں نا مِٹسے خود مِٹ ویساں اہَدا ہا
گلشن دے وچ ویندے ہاسے
پھُل ہک ٻے کوں ݙیندے ہاسے
اے منظر میں نا وِسریساں اہَدا ہا
سوہݨا عید شوال دا ݙینہہ ہا
پُس ڳے ہاسے وسدا مینہہ ہا
نال تیݙے ہر عید منیساں اہدَا ہا
نازش وعدے بھُل ڳے سارے
میݙے خواب تاں رُل ڳے سارے
خوابیں وچ میں رنگ بھر ݙیساں اہدا ہا
صوفی نجیب اللہ نازش
x
0 Comments