"آ کوڑ الانونڑ کار کروں

"آ کوڑ الانونڑ کار کروں

او وچھڑنڑ ویلہا یاد ہوی

ہک بے کوں آسرے ڈیونڑ لو

اساں گالہیں ڈھیر کریندے رہے 

ہک بئے کوں سچ الویندے رہے 

تیءں آکھیا ہا میڈی فکر نہ کر

جڈاں عید دا چندر نظر آوے 

جڈاں چیتر دی سرمی نسر ونجے 

جڈاں ساونڑ ساول گھن آوے 

جڈاں ہاڑ دے چونسے لہہ پوون

جڈاں پالا پوھ دا ہڈیں وچ ،

برفیں دے وانگوں پہہ ونجے 

توں میکوں دل نال یاد کریں

جہڑا موسم ہوسی اوں پل دا

اوہو موسم بنڑ کے آویساں

تیڈی ساری مونجھ لہا ویساں

ترسلے میں وی ڈتے ہن

میں آکھیا ہا کم کاج دے وچ

روزی روٹی دے چکر ء چ

میں یاد رکھیساں پل پل سب

تیڈی یاد آسی تاں کڈھ آساں

تیڈیاں ونگاں ،مندریاں ، چھلے سب

پا ککھٹڑا امب دی چھاں تلے 

میں ہاں تے رکھ کے سم پوساں 

کجھ نیر اکھیں دی چنڈ کولوں

وت آپے اپ ای واہسن پے 

تیڈی مونجھ لہا کے چن ماہی

وت بکسے سانبھ کے رکھ آساں 

کئی موسم ہجر دے گذر وی گئے 

کئی سال مہینے لنگھ وی گئے 

کئی چیتر ، وساخ تے جیٹھ لنگھئیے 

کئی ساونڑ ، بدرے وس وی گئے 

کئی پوہ گذریے کئی پالے وی

کئی ہاڑ تے کئی ہنالے وی

تیکوں ول وی یاد نمہیں آیا

تیڈے ولنڑ دا موسم نیءں آیا

وت کینجھا سنجا میں ہامی

روزی روٹی دے چکر وچ

تیڈیاں مندریاں چھلے گال بیٹھاں

کجھ لوک نویں جو مل پئے می

بئے مندریاں چھلے ڈے گھن تے 

میں تیڈی مونجھ وی گال بیٹھاں

جیویں جگ کوڑا ، اوویں توں کوڑا

جیویں توں کوڑا ، اوویں میں کوڑا 

سچ تیڈے میڈے کوڑ تھئے 

سب پیار دے قصے دھوڑ تھئے

آ ہک واری ، ول مل تاں سہی

ول منڈھ توں قول،اقرار کروں

ساکوں راس نی خالد سچ بولنڑ

آ کوڑ الاونڑ کار کروں