کلام ۔۔۔اشو لعل فقیر

دریا او دریا پانی تیڈے ڈونگے 
توں ساڈا پیر ماہ اساں تیڈے پونگے 
دریا او دریاپانی تیڈے ساوے 
اوہو ویلا ہر دم جیڑھا نال راہوے 
دریا او دریا تیڈے ساڈے سانگے 
ہنساں دی صورت پانیاں دے وانگے 
دریا او دریا دھپ تیڈی تکھڑی
بیڑیاں وچ لنگھ گئی عمرھاں دی لکھڑی
دریا او دریا چن تھیا پورا
لوڑی پلوڑھی جیون ادھورا
دریا او دریا جنگلاں دے سانویں
کہیں ڈینھہ تاں ہوسی خوشی ساڈے نانویں
دریا او دریا ڈسا دل دا جانی
کتھاں تیڈے پکھنوں کتھاں تیڈا پانی
دریا او دریا اچی تیڈی ماڑی
ماڑی دے اندر مونجھا دی ماری
***
ناھراں کنی بھوم پئی وت بھیڈاں بکریاں وکیاں
آجڑی یار نہ وڑھیا واڑے اکھیں تک تک تھکیاں
ناھراں دے وس کلھے کتے رت ء چ بھا وسمائی
سیکل سیتے منگھر پوہ وچ اکھیں رات لنگھائی
وت وی کتا اؤترا کتا نہ بھانڑیں نہ بھائیں
سجھ ابھرے تاں آجڑی آکھے دھر اوئے مرنی سائیں
کلام ۔۔۔اشو لعل فقیر